𑐢𑐫𑐵𑐏𑑃 𑐥𑐶𑐠𑐣𑐵 𑑑𑑑𑑓𑑙

𑐢𑐫𑐵𑐏𑑃 𑐥𑐶𑐠𑐣𑐵
𑐣𑐾𑐥𑐵𑐮 𑐳𑐩𑑂𑐧𑐟 𑑑𑑑𑑓𑑙 𑐟𑐕𑐮𑐵 𑑑𑑔

𑐎𑐸𑐊𑐬 𑐮𑑂𑐫𑐵𑐫𑐾𑐩𑐶 𑐥𑐸𑐔𑑅 (Queer Youth Group) 𑐳𑑄 𑐠𑑂𑐰 𑐥𑐶𑐠𑐣𑐵𑐫𑐵 𑐩𑐵𑐢𑑂𑐫𑐩𑑄 𑐳𑐎𑐮𑐾𑑄 𑐩𑐶𑐡𑐶𑐫𑐵𑐎𑑅𑐩𑐶𑐟𑐫𑐾𑐟𑑅 𑐠𑑂𑐰 𑐴𑐾 𑐣𑐾𑐥𑐵𑐮 𑐳𑐩𑑂𑐧𑐟 𑑑𑑑𑑓𑑙 𑐟𑐕𑐮𑐵𑐐𑐵𑑅 𑐊𑐎𑐵𑐡𑐳𑐶 𑐀𑐬𑑂𑐠𑐵𑐟𑑂 𑐖𑐹𑐣 𑑒𑑙 𑐏𑐸𑐣𑐸 𑐳𑐸𑐠𑐫𑑂 𑑑𑑐 𑐧𑐖𑐾 𑐣𑐶𑐳𑐾𑑄 𑐦𑐶𑐧𑑂𑐰𑑅𑐏𑑂𑐫𑑅 (𑐩𑐵𑐂𑐟𑐷𑐑𑐬 𑐩𑐞𑑂𑐜𑐮𑐵)𑐳𑑄 𑐐𑑁𑐬𑐧𑐫𑐵𑑅 (Pride Parade) 𑐣𑑂𑐫𑐵𑐫𑐾𑐎𑐾 𑐟𑑂𑐫𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐔𑑂𑐰𑐣𑐵𑑋 𑐣𑑂𑐴𑐵𑐥𑐵𑑄 𑐦𑐶𑐧𑑂𑐰𑑅𑐏𑑂𑐫𑐮𑐫𑑂 𑐩𑐸𑐣𑐵𑑄 𑐬𑑂𑐫𑐵𑐮𑐶 𑐫𑐵𑐳𑐾𑑄 𑐏𑐸𑐣𑑂𑐠𑐹 (𑐣𑐫𑐵𑑃 𑐧𑐵𑐣𑐾𑐱𑑂𑐰𑐬)𑐳𑑄 𑐎𑑂𑐰𑐔𑐵𑐫𑐾𑐎𑐾𑐐𑐸 𑐖𑐸𑐂𑑋

𑐐𑑁𑐬𑐧𑐫𑐵𑑅, 𑐀𑐒𑑂𑐐𑑂𑐬𑐾𑐖𑐷 𑐨𑐵𑐳𑑄 Pride Parade, 𑐴𑐮𑐶𑑄 𑐫𑐒𑑂𑐎 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅 (𑐫𑑁𑐣𑐶𑐎 𑐟𑐠𑐵 𑐮𑐿𑐒𑑂𑐐𑐶𑐎 𑐀𑐮𑑂𑐥𑐳𑐒𑑂𑐏𑑂𑐫𑐎) 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐫𑐵𑐂𑐐𑐸 𑐬𑑂𑐫𑐵𑐮𑐷 𑐏𑑅𑑋 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅 𑐀𑐠𑐧𑐵 𑐎𑐸𑐊𑐬 𑐩𑐣𑐹𑐟𑐫𑐾𑐐𑐸 𑐡𑐺𑐱𑑂𑐫𑐟𑐵, 𑐟𑑅𑐟𑐵𑐖𑐷 𑐖𑐵𑑅 𑐰 𑐫𑐔𑐵 𑐩𑑂𑐴𑐳𑐶𑐎𑐵𑐟𑐫𑐾𑐐𑐸 𑐄𑐟𑑂𑐳𑐰 𑐰 𑐠𑑅𑐐𑐸 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐳𑑄𑐑𑐬𑑂𑐲𑐫𑐵 𑐎𑐠𑑄 𑐐𑑁𑐬𑐧𑐫𑐵𑑅 𑐣𑐵𑐫𑐾𑐎𑐷𑑋 𑐖𑐹𑐣 𑐩𑐴𑐶𑐣𑐵𑐫𑐵𑐟𑑅 𑐡𑐾𑐳𑑄𑐡𑐾 𑐐𑑁𑐬𑐧𑐮𑐵 (International Pride Month) 𑐢𑐎𑐵𑑅 𑐴𑐣𑐶𑑄𑑋 𑐴𑐮𑐶𑑄 𑐫𑐒𑑂𑐎 𑐠𑑂𑐰 𑐴𑐾 𑐮𑐔𑑂𑐕𑐶𑐂 𑐠𑐶𑐠𑐶 𑐡𑐾𑐳𑐫𑑂 𑐐𑑁𑐬𑐧𑐫𑐵𑑅 𑐣𑑂𑐫𑐵𑐫𑐾𑐎𑐷𑑋 𑐀𑐖𑑂𑐫𑐵𑑅𑐐𑐸 𑐳𑐩𑐵𑐖 𑐐𑐣 𑐣𑐶𑐠𑐷 𑐖𑐎𑑂𑐎 𑐫𑐔𑐶𑑄 (𑐮𑐶𑐒𑑂𑐐)𑐫𑐵𑐟𑑅 𑐩𑐵𑐣𑑂𑐫𑐟𑐵 𑐧𑐷, 𑐣𑐶𑐠𑐷 𑐖𑐎𑑂𑐎 𑐖𑐵𑑅 𑐩𑑂𑐴𑐳𑐶𑐎𑐵 (𑐮𑐿𑐒𑑂𑐐𑐶𑐎 𑐥𑐴𑐶𑐔𑐵𑐣)𑐫𑐵𑐟𑑅 𑐖𑐎𑑂𑐎 𑐠𑐵𑐫𑑂 𑐧𑐷 𑐀𑐮𑐫𑑂 𑐀𑑅𑐏𑑅 𑐖𑐵𑑅 𑐥𑐵𑐏𑐾 𑐖𑐸𑐂𑐐𑐸 𑐁𑐎𑐬𑑂𑐲𑐞𑐫𑐵𑐟𑑅 𑐖𑐎𑑂𑐎 𑐳𑐵𑐩𑐵𑐣𑑂𑐫 𑐢𑐎𑐵𑑅 𑐢𑐵𑐂, 𑐄𑐐𑐸 𑐳𑐩𑐵𑐖𑐫𑑂 𑐫𑐔𑐶𑑄 (𑐮𑐶𑐒𑑂𑐐), 𑐖𑐵𑑅 (𑐮𑐿𑐒𑑂𑐐𑐶𑐎𑐟𑐵) 𑐰 𑐫𑐔𑐵 𑐎𑑂𑐰𑐳𑐵𑑅 (𑐫𑑁𑐣 𑐀𑐨𑐶𑐩𑐸𑐏𑐶𑐎𑐬𑐞) 𑐟𑑅𑐟𑐵𑐖𑐶 𑐎𑐠𑑄𑐫𑐵 𑐡𑐿 𑐢𑐎𑐵𑑅 𑐳𑐷𑐎𑐵𑐧𑐷𑐐𑐸 𑐣𑐶𑐟𑐶𑑄, 𑐖𑐣𑐔𑐾𑐟𑐣𑐵 𑐧𑑂𑐰𑐮𑐒𑑂𑐎𑐾𑐐𑐸 𑐣𑐶𑐟𑐶𑑄 𑐰 𑐠𑑅𑐐𑐸 𑐴𑐎 𑐴𑐶𑐟𑐫𑐵 𑐣𑐶𑐟𑐶𑑄 𑐠𑑂𑐰 𑐐𑑁𑐬𑐧𑐫𑐵𑑅 𑐣𑐵𑐫𑐾𑐎𑐷𑑋

𑐳𑐣𑑂 𑑑𑑙𑑖𑑙 𑐳𑑄 𑐀𑐩𑐾𑐬𑐶𑐎𑐵𑐫𑐵 𑐣𑑂𑐫𑐹 𑐫𑑀𑐬𑑂𑐎 𑐳𑐴𑐬𑐫𑑂 𑐡𑐹𑐐𑐸 𑐳𑑂𑐟𑑀𑐣𑐰𑐵𑐮 𑐢𑐵𑑅𑐐𑐸 𑐴𑑀𑐟𑐾𑐮 𑐣𑑂𑐴𑑂𑐫𑑅𑐣𑐾 𑐖𑐹𑐐𑐸 𑐁𑐣𑑂𑐡𑑀𑐮𑐣𑑄 𑐐𑑁𑐬𑐧𑐫𑐵𑑅 𑐣𑑂𑐫𑐵𑐫𑐾𑐎𑐾𑐐𑐸 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐵𑑅𑐐𑐸 𑐏𑑅𑑋 𑐳𑐩𑐵𑐖𑐫𑑂 𑐠𑐶𑐠𑐶 𑐎𑐠𑑄𑐫𑐵 𑐮𑐵𑐣𑑂𑐕𑐣𑐵𑑄 𑐎𑐷𑐎𑐾𑐩𑐵𑑅𑐐𑐸 𑐖𑐸𑐫𑐵𑑅 𑐠𑑅𑐐𑐸 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐳𑑅 𑐧𑑂𑐰𑐮𑐒𑑂𑐎𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐐𑑁𑐬𑐧𑐫𑐵𑑅 𑐥𑐵𑐏𑐾𑑄 𑐴𑐮𑐶𑐩𑐫𑑂 𑐎𑐸𑐊𑐬 (𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅)𑐟𑐫𑐾𑐐𑐸 𑐀𑐢𑐶𑐎𑐵𑐬𑐫𑐵 𑐳𑐰𑐵𑐮𑐫𑑂 𑐫𑐎𑑂𑐰 𑐟𑐵𑑅𑐟𑐸𑐣𑐵 𑐥𑐹𑐰𑑄𑐐𑐸 𑐡𑐸𑑋 𑐡𑐔𑑂𑐕𑐶 𑐃 𑐡𑐸𑐣𑐾 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅 𑐧𑐵𑐬𑐾 𑐠𑐶𑐠𑐶 𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅𑐟 𑐴𑐣𑐵 𑐰𑑅𑐳𑐵𑑄 𑐐𑑁𑐬𑐧𑐮𑐵 𑐏𑐸𑐣𑐸 𑐐𑑁𑐬𑐧𑐫𑐵𑑅 𑐣𑑂𑐫𑐵𑐫𑐾𑐎𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐣𑐾𑐥𑐵𑐮𑐫𑑂 𑐠𑑂𑐰 𑐣𑑂𑐴𑐵𑐥𑐵𑑄𑐐𑐸 𑐏𑑅𑑋 𑐠𑑂𑐰 𑐐𑑁𑐬𑐧𑐫𑐵𑑅 𑑒𑑕𑐡𑑃 𑐳𑐶𑐧𑐾𑑄 𑐎𑑂𑐰𑐎𑐮𑐶𑐥𑐶𑐣𑐾𑐐𑐸 𑐣𑐵𑐫𑑅𑐳𑐸𑐂 𑐣𑑂𑐫𑐵𑐫𑐾𑐎𑐾𑐟𑑂𑐫𑐣𑐵𑐐𑐸 𑐏𑑅𑑋

𑐠𑐸𑐐𑐸𑐳𑐶𑐂 𑐗𑐷𑐐𑐸 𑐣𑐵𑐬𑐵 𑐠𑐸𑐐𑐸 𑐎𑐠𑑄 𑐡𑐸 : “𑐬𑐵𑐖𑑂𑐫𑐫𑐵 𑐦𑐸𑐎𑑂𑐎 𑐟𑐐𑐶𑑄 𑐟𑐐𑐶𑑄𑐳𑑄 𑐰 𑐎𑑂𑐰𑑅𑐕𑐶𑐣𑐵𑐫𑐵 𑐖𑑂𑐫𑐵𑐠𑐵𑐫𑑂 (𑐣𑐶𑐬𑑂𑐞𑐵𑐫𑐎 𑐨𑐹𑐩𑐷𑐎𑐵𑐳𑑄) 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅𑐟𑐫𑐾𑐟𑑅 𑐡𑐸𑐠𑑂𑐫𑐵𑐎𑐵𑑅 𑐧𑑂𑐰𑐟𑐶 𑐎𑐵𑐫𑐾𑐎𑐾”𑐕𑑋 𑐣𑐾𑐥𑐵𑐮𑐫𑐵 𑐳𑑄𑐰𑐶𑐢𑐵𑐣𑐫𑑂 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅 𑐢𑐎𑐵𑑅 𑐔𑑂𑐰𑐫𑐵𑐟𑑅𑐐𑐸 𑐡𑐸𑐳𑐵𑑄 𑐬𑐵𑐖𑑂𑐫𑐫𑐵 𑐕𑐸𑑄 𑐣𑑄 𑐣𑐶𑐎𑐵𑐫 𑐧𑐵 𑐟𑐐𑐶𑐩𑐫𑑂 𑐗𑐷𑐟𑑅 𑐡𑐸𑐠𑑂𑐫𑐎𑐵𑑅𑐟𑑅𑐐𑐸 𑐩𑐡𑐸𑑋 𑐎𑑂𑐰𑑅𑐕𑐶𑐣𑐵𑐫𑐵 𑐖𑑂𑐫𑐵𑐠𑐵𑐫𑑂 (𑐣𑐶𑐬𑑂𑐞𑐵𑐫𑐶𑐎 𑐨𑐹𑐩𑐷𑐎𑐵)𑐳𑑄 𑐐𑐣𑑄 𑐡𑐸𑐠𑑂𑐫𑐵𑐎𑐵𑑅𑐩𑐟𑑅𑐐𑐸𑐮𑐶𑑄 𑐡𑐫𑐾𑐎𑐵𑐔𑑂𑐰𑑄𑐐𑐸 𑐋𑐣, 𑐎𑐵𑐣𑐸𑐣 𑐰 𑐣𑐷𑐟𑐶 𑐣𑐶𑐫𑐩𑐟 𑐕𑐸𑐎𑐾𑑄 𑐣𑑄 𑐗𑐷𑐐𑐸 𑐩𑐸𑐡𑑂𑐡𑐵𑐟 𑐳𑐩𑑂𑐧𑑀𑐢𑐣 𑐩𑐖𑐹𑑋 𑐗𑐷𑐐𑐸 𑐣𑐶𑐟𑐶𑑄 𑐋𑐣 𑐎𑐵𑐣𑐸𑐣𑐫𑑂 𑐐𑐣𑑄 𑐮𑑂𑐰𑐫𑐾𑐎 𑐰𑑂𑐫𑐰𑐳𑑂𑐠𑐵 𑐣𑑄 𑐫𑐵𑐣𑐵 𑐩𑐟𑑅𑑋 𑐀𑐠𑐾 𑐖𑐸𑐫𑐵𑑅 𑐎𑑂𑐰𑑅𑐕𑐶𑐣𑐵𑐫𑐵 𑐖𑑂𑐫𑐵𑐠𑐵𑐫𑑂 (𑐣𑐶𑐬𑑂𑐞𑐵𑐫𑐎 𑐨𑐹𑐩𑐷𑐎𑐵)𑐫𑑂 𑐖𑑂𑐰𑐮𑐶𑑄𑐖𑑂𑐰𑐫𑐾𑐎 𑐡𑐸𑐠𑑂𑐫𑐵𑐎𑐾𑐩𑐵𑑅 𑐢𑐿𑐐𑐸𑐫 𑐗𑐷𑐐𑐸 𑐳𑑅 𑐏𑑅𑑋

𑐎𑐸𑐊𑐬 𑐮𑑂𑐫𑐵𑐫𑐾𑐩𑐶 𑐥𑐸𑐔𑑅 𑐠𑑅𑐫𑐵𑐟𑑅 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅 𑐡𑐸𑐣𑐾𑐫𑐵 𑐠𑐶𑐠𑐶 𑐩𑑂𑐴𑐳𑐶𑐎𑐵𑐟 𑐩𑐢𑑂𑐫𑐾 𑐩𑑂𑐴𑐳𑐶𑐎𑐵 𑐧𑐷𑐥𑐶𑑄 𑐮𑑂𑐫𑐵𑐫𑐾𑐩𑐶 (𑐫𑐸𑐰𑐵)𑐟𑐫𑐾𑐐𑐸 𑐕𑐟𑐵 𑐐𑐿𑐬-𑐡𑐬𑑂𑐟𑐶𑐟 𑐥𑐸𑐔𑑅 𑐏𑑅𑑋 𑐳𑐣𑑂 𑑒𑑐𑑑𑑙𑐫𑐵 𑐳𑐸𑐬𑐸𑐰𑐵𑐟 𑐣𑐶𑐳𑐾𑑄 𑐠𑐸𑐎𑐾𑐫𑐵 𑐥𑐮𑐶𑐳𑑂𑐠𑐵 𑐖𑐸𑐮𑑋 𑐠𑐸𑐐𑐸 𑐥𑐸𑐔𑐮𑑄 𑐖𑐵𑑅 𑐰 𑐫𑐔𑐵 𑐩𑑂𑐴𑑂𑐰𑑅𑐮𑑂𑐫𑐵𑑅 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐰𑐎𑐵𑐮𑐟 𑐫𑐵𑐳𑐾𑑄 𑐖𑐣𑐔𑐾𑐟𑐣𑐵 𑐧𑑂𑐰𑐮𑐒𑑂𑐎𑐾𑐐𑐸 𑐖𑑂𑐫𑐵 𑐫𑐵𑐂𑑋

𑐥𑐮𑐶𑐳𑑂𑐠𑐵𑐩𑐶 𑐡𑐸𑐖𑑅𑐟 :
𑐡𑐶𑐥𑐾𑐱 𑐱𑑂𑐬𑐾𑐲𑑂𑐛, 𑐬𑐸𑐎𑑂𑐱𑐣𑐵 𑐎𑐥𑐵𑐮𑐷, 𑐳𑐦𑐮 𑐮𑐵𑐩𑐵