𑐖𑐸𑐣 𑐩𑐴𑐶𑐣𑐵𑐫𑐵 𑐣𑐶𑐎𑑂𑐰𑑅𑐐𑐸 𑐳𑐣𑑂𑐔𑐬𑐧𑐵𑑅 𑐣𑐾𑐥𑐵𑐮𑐫𑑂 𑐐𑑁𑐬𑐧𑐫𑐵𑑅 𑐣𑑂𑐫𑐵𑐂

𑐴𑐣𑐾𑐧𑐴𑑅𑐥𑐶𑑄 𑐳𑐎𑐮𑐾𑑄,

‘𑐣𑐾𑐥𑐵𑑅 𑐎𑐸𑐊𑐬 𑐐𑑁𑐬𑐧𑐫𑐵𑑅’ 𑐐𑑂𑐰𑐳𑐵𑑅 𑐏𑐮𑑅 𑐥𑐵𑐏𑐾𑑄 𑐣𑐾𑐥𑐵𑐮𑐫𑑂 𑐡𑑃𑐫𑑂 𑐡𑐳𑑄 𑐂𑐳𑑂𑐰𑐷 𑐳𑐩𑑂𑐧𑐟𑐫𑐵 𑐖𑐸𑐣 𑐩𑐴𑐶𑐣𑐵𑐫𑐵 𑐣𑐶𑐎𑑂𑐰𑑅𑐐𑐸 𑐳𑐣𑑂𑐔𑐬𑐧𑐵𑑅 𑐏𑐸𑐣𑐸 𑐐𑑁𑐬𑐧𑐫𑐵𑑅 𑐣𑑂𑐫𑐵𑐫𑐾𑐐𑐸 𑐖𑐸𑐂 𑐢𑐎𑐵𑑅 𑐳𑐎𑐳𑐶𑐟𑑅 𑐎𑐣𑐵𑑄𑐔𑑂𑐰𑐣𑐵 𑑋

𑐠𑐄𑐣𑐾 𑐳𑐣𑑂 𑑒𑑐𑑑𑑙 𑐳𑑄 𑐣𑐾𑐥𑐵𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐏𑐸𑐳𑐶𑐂 𑐖𑐹𑐐𑐸 𑐐𑑁𑐬𑐧𑐫𑐵𑑅 𑐳𑑂𑐟𑑀𑐣𑐰𑐵𑐮 𑐰𑐶𑐡𑑂𑐬𑑀𑐴𑐫𑐵 𑐣𑑂𑐫𑐫𑐾𑐎𑑂𑐰𑑅𑐐𑐸 𑐧𑐸𑐡𑐶𑑄𑐫𑐵 𑐎𑐣𑑂𑐴𑐾 𑐏𑐸𑐣𑐸 𑐮𑐵𑐎𑐵𑑅 𑐣𑑂𑐫𑐵𑐫𑐾𑐎𑐵𑐐𑐸 𑐏𑑅𑐳𑐵𑑄 𑐳𑐣𑑂 𑑒𑑐𑑒𑑐 𑐣𑐶𑐳𑐾𑑄 𑐠𑑂𑐰 𑐡𑐶𑑄 𑐴𑐶𑐮𑐵𑑅 𑐖𑐸𑐣 𑐩𑐴𑐶𑐣𑐵𑐫𑐵 𑐣𑐶𑐎𑑂𑐰𑑅𑐐𑐸 𑐳𑐣𑑂𑐔𑐬𑐧𑐵𑑅 𑐴𑐣𑐾𑐐𑐸 𑐖𑐸𑐮 𑑋 𑐠𑑂𑐰𑐏𑐸𑐣𑐸 𑐫𑐵𑐫𑐾𑐐𑐸 𑐢𑐎𑐵𑑅 𑐎𑑂𑐰𑑅𑐕𑐷𑐟𑑅 𑐠𑐄𑐣𑐾 𑐰𑑅𑐐𑐸 𑐳𑐸𑐗𑐵𑐧 𑐎𑐫𑐵𑑅 𑐳𑐴𑐮𑐴 𑐖𑐸𑐮 𑑋 𑐳𑐣𑑂𑐔𑐬𑐧𑐵𑑅 𑐮𑐵𑐎𑐹 𑐳𑐵 𑐳𑐎𑐳𑐶𑐫𑐵𑑄 𑐧𑑂𑐫𑐬 𑐡𑐂 𑐏𑐸𑐣𑐸 𑐮𑐵𑐂 𑐀𑐮𑐫𑑂 𑐫𑐎𑑂𑐰𑐳𑐶𑐫𑐵 𑐮𑐶𑐮𑐵𑐂 𑐢𑐎𑐵𑑅 𑐠𑐸𑐏𑐸𑐣𑐸 𑐫𑐵𑐫𑐾 𑐟𑑂𑐫𑐣𑐵𑐐𑐸 𑐏𑑅 𑑋 𑐀𑐠𑐾𑐟𑐸𑑄 𑐳𑐣𑑂𑐔𑐬𑐧𑐵𑑅 𑐖𑐸𑐮 𑐎𑐶 𑐮𑑃𑐫𑑂 𑐫𑐎𑑂𑐰 𑐩𑐟𑐬 𑐣𑑄 𑐡𑐂𑐩𑐏𑐸 𑐀𑐮𑐫𑑂 𑐮𑑃 𑐫𑐵𑐄𑑃𑐂𑐐𑐸 𑐖𑐸𑐫𑐵𑑅 𑐣𑑄 𑐠𑑂𑐰𑑅 𑐮𑐶𑐔𑑂𑐰𑑅 𑐎𑐫𑐵𑐐𑐸 𑐖𑐸𑐮 𑑋 𑐩𑑁𑐳𑐩𑐫𑐵 𑐧𑐵𑐬𑐾 𑐣𑑄 𑐰𑑅𑐐𑐸 𑐳𑐸𑐗𑐵𑐧𑑄 𑐫𑐵𑐣𑐵𑑄 𑐠𑐠𑐾 𑐎𑑂𑐰𑑅𑐕𑐶𑐣𑐵𑐐𑐸 𑐏𑐟 𑑋 𑐁𑑅 𑐐𑐸𑐏𑐸𑐣𑐸 𑐕𑐸 𑐖𑐸𑐂 𑐢𑐎𑐵𑑅 𑐮𑐵 𑐥𑐵𑐫𑐕𑐶 𑐢𑐵𑐫𑐾 𑐠𑐵𑐎𑐸, 𑐀𑐫𑐾𑐣𑑄 𑐖𑐸𑐣 𑑒𑑙 𑐟𑐵𑐬𑐶𑐏 𑐁𑐥𑐮𑑄 𑐀𑐳𑐵𑐬𑐫𑐵 𑐡𑐠𑐸𑐂 𑐮𑐵𑑅𑐐𑐸 𑐀𑐮𑐫𑑂 𑐗𑐷 𑐥𑐬𑐩𑑂𑐥𑐬𑐵𑐐𑐟 𑐐𑑂𑐫𑐵𑑄 𑐎𑐠𑑄 𑐰𑐧𑐮𑐫𑑂 𑐁𑐥𑐮𑑄 𑐰𑐵 𑐰𑐂𑐐𑐸 𑐳𑐩𑑂𑐨𑐵𑐰𑐣𑐵 𑐀𑐥𑑂𑐰𑑅𑐐𑐸𑐮𑐶𑑄 𑐠𑐸𑐐𑐸 𑐎𑐠𑑄 𑐎𑑂𑐰𑑅𑐕𑐶𑐣𑐵𑐐𑐸 𑐏𑑅 𑑋 𑐠𑑂𑐰 𑐏𑑃 𑐳𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐟𑐫𑐵𑐧𑐮𑐫𑑂 𑐣𑑄 𑐁𑐥𑐮𑑄 𑐩𑐣𑐹𑐟𑐫𑐾𑐳𑑄 𑐳𑐣𑑂𑐔𑐬𑐧𑐵𑐬 𑐴𑐾 𑐮𑐵𑐎𑐹𑐳𑐵 𑐖𑑂𑐫𑐹 𑐢𑐎𑐵𑑅 𑐢𑐵𑑅𑐐𑐸 𑐏𑑅 𑑋

𑐳𑐣𑑂 𑑒𑑐𑑒𑑐 𑐣𑐶𑐳𑐾𑑄 𑐖𑐸𑐣 𑐩𑐴𑐶𑐣𑐵𑐫𑐵 𑐣𑐶𑐎𑑂𑐰𑑅𑐐𑐸 𑐳𑐣𑑂𑐔𑐬𑐧𑐵𑑅 𑐣𑐾𑐥𑐵𑐮𑐫𑑂 𑐐𑑁𑐬𑐧𑐫𑐵𑑅 𑐣𑑂𑐫𑐵𑐫𑐾𑐎𑐾𑐐𑐸 𑐡𑐶𑑄 𑐏𑑅 𑑋

𑐠𑐸𑐐𑐸𑐳𑐶𑐂 𑐖𑐹𑐣 𑐩𑐴𑐶𑐣𑐵𑐫𑐵 𑐣𑐶𑐎𑑂𑐰𑑅𑐐𑐸 𑐳𑐣𑑂𑐔𑐬𑐧𑐵𑑅 13 June 2020, 𑑓𑑑 𑐖𑐾𑐛 𑑒𑑐𑑗𑑗, 𑐣𑐾𑐥𑐵𑐮 𑐳𑐩𑑂𑐧𑐟 𑑑𑑑𑑔𑑐 𑐟𑐕𑐮𑐵𑐐𑐵𑑅 𑐀𑐳𑑂𑐟𑐩𑐶 𑐏𑐸𑐣𑐸 𑐮𑐵𑑅 𑑋

𑐕𑐶𑐎𑐥𑐶𑑄 𑐳𑐎𑐮𑐳𑐶𑐫𑐵𑑄 𑐮𑐳𑐟𑐵 𑐔𑐵𑐫𑐵𑑅 𑐧𑑂𑐰𑐟𑐶 𑐎𑐫𑐵𑐡𑐷𑐟𑑅 𑐧𑑂𑐰𑐣𑐵𑐔𑑂𑐰𑐣𑐵, 𑐣𑑂𑐫𑐒𑑂𑐎𑐵𑐔𑑂𑐰𑐣𑐵 𑑋

𑐳𑐸𑐨𑐵𑐫𑑂 !