थुकेया बारे

कुएर गौरबयाःया वेबसाइतय् लसकुस दु । थ्व नेपाःया न्हापांगु गौरबयाः खः । झीसं नेपाल सम्बत ११३९ सन् २०१९ निसें थुकेयातः न्ह्याकागु खः । थुगु ऐतिहासिक क्षणयातः सम्भव यायेगुलिइ कुएर ल्यायेमि पुचः ( Queer Youth Group ) व कुएर अधिकार मंकाः खलः ( Queer Rights Collective ) नापं जानागु खः ।

नेपालय् कुएर ( जाः व यचा म्ह्वःल्याः ) बारे थिथि ज्याझ्वःत व र्यालित न्ह्याकाच्वंगु खः । ‘गौरबयाः’ (प्राइड परेड) हे धाःसा गबलें ग्वसाः मग्वःनिगु कारनं जिम्सं देसंदे गौरबला ( International Pride Month ) जूनया अबसर चूलाकाः स्तोनवाल विद्रोहया न्ययेदँ क्यंगु दिंया कन्हे खुनु जून २९ तारिखं गौरबयाः न्यायेका ।

उलसं निसें जून महिनाया निक्वःगु सन्चरबाः दँय् दँय् गौरब दिं धकाः हनेगु जुल ।

थ्व गौरबयाः छु खः ?

१. नेपाःया न्हापांगु गौरबयाः । थ्व सिबें न्ह्यः नं कुएर ( जाः व यचा म्ह्वःल्याः ) बारे थिथि ज्याझ्वःत व र्यालित याःगु दु सां गौरबयाः हे धकाः थ्व न्हापांगु खः ।
२. थ्व पूवङ्क ल्यायेमि (युवा) तयेगु नायःसुइ न्यायेका च्वनागु खः । थुगु गौरबयाःया ग्वसाः खलकय् २५ दं क्वंपिं ल्यायेमित दु । झीपिं छुं गैर-ल्यायेमि संघ संस्थायागु ल्यायेमि कचा मखु ।
३. थुगु ज्याझ्वःया नितिं जिम्सं थः हे ध्यबा फयाःच्वना । छुं कथंया देसंदे दातात व कम्पनि कर्पोरेत पाखें ध्यबा मकया ।
४. अङ्ग्रेजी भासं LGBT धाःगु सिबें नं अप्वः तःताजि म्हसिकात दुथ्याः । LGBT धाल कि Lesbian ज्वःयचा मिसा, Gay ज्वःयचा मिजं, Bisexual ज्वःबिज्वःयचा व Transgender ब्याग्जाः खः । झीसं थुपिं प्यताजी जक्क मखुसे फुक्क ‘कुएर विविधता’ (Queer diversity)यातः कःघाना । कुएर (Queer) धाल कि झीगु समाजय् नालाःमतःगु स्वीकारेमयाःगु थिथि कथंया यचिं (sex characteristics), जाः म्हसिका (gender identity) व यचा क्वसाः (sexual orientation)या विविधतायतः कःघाइगु कुसा खँग्वः खः ।
५. ह्वङ्गः (अन्तर्वर्गियता) जिमेगु मूल मर्म खः ।
६. सन् २०२० नेपाल सम्बत ११४० निसें ल्हाःभाय् सःम्ह मनू नं तया । झीसं गौरबयाः ग्वसाः ग्वइ बलय् ह्वाइकाः मनूत (people with disabilities) नं वय् ज्याछिंगु कथंया थाय् ल्ययेगु याना ।
७. झी तःताजि भाय् ल्हाइपिं, तःताजि तजिलजियापिं व तःताजि कथंयापिं खः । सन् २०१९ नेपाल सम्बत ११३९ सं ग्वसाः ग्वयागु थाय् माइतीघर मण्डलाया मौलिक नां ‘फिब्वःख्यः’ हे छ्यलाबुला याना । थुगु कथं झीसं गौरबयाः ग्वसाः ग्वइगु थासय् हुयाःछ्वयेत्यंगु थिथि मौलिक नांत छ्यलाबुला याना । झीगु ब्यानरत अङ्ग्रेजी, पर्वते भाय् , नेपालभास, व तामाङ भासं छापेयायेगु यानाच्वना अलय् बुलुहुँ अझ अप्वः भाय् दुथ्याकाः न्ह्यानाच्वने ।

थ्व गौरबयाः छु मखु ?

१. थ्व Gay Pride, LGBT Pride, Third Gender March वा समलिङ्गी/तेस्रोलिङ्गी र्यालि मखु । मिदियाय् आपलं थुगु खँग्वःत छ्यलाबुला जुइ धायेवं अर्थ हे पाक्क छ्यलाबुला यानादीमते । जिम्सं धायेगु ‘कुएर गौरबयाः’ (Queer Pride Parade) हे खः । संविधानया भाय् नापं ज्वःलाकेतः ‘जाः व यचा म्ह्वःल्याः’ (लैङ्गिक तथा यौनिक अल्पसङ्ख्यक) धयागु खँग्वः नं छ्यला । यदि ‘कुएर’ खँग्वःया अर्थ मनूतयेसं मथूसा बुखँ च्वइबलय् सिथय् लाक्क कुएर धयागु छु खः धकाः ध्वाथुइकुसां ज्यू । थ्व Gay Pride मखु, छाय् धाःसा Gay धयागु ज्वःयचा मिजंत खः । ज्वःयचा मिजंत नं कुएर कुसा (Queer umbrella) दुने लाः, तर इपिं जक्कं थ्व विविधतायातः प्रतिनिधित्व याइमखु । अथेतुं तेस्रोलिङ्गी धाल कि नं कुएर कुसा दुने लाःवः तर फुक्क कुएर मनूत तेस्रोलिङ्गी मखु । LGBT र्यालि धाल कि हाकनं ज्वःयचा मिसा, ज्वःयचा मिजं, ज्वःबिज्वःयचा व ब्याग्जाःत जक्क दुथ्याइगु जुल । तर कुएर कुसा दुने ला गुलियचा (Asexual), दोखुनुयचा (Pansexual), जाः त्याछिम्हांपिं (Gender non-conforming), हुस्लुंजाः (Genderfluid), इत्यादी थिथि विविधता दु अलय् LGBT जक्क धाल कि उपिं दुथ्याइ मखु ।

झीसं ग्वसाः ग्वयागु मेमेगु गौरबयाः

१. लागाः पतिंया गौरबयाः ( अझं सहलह जुयाच्वंगु )
२. ह्वङ्गः (अन्तर्वर्गिय) गौरबयाः

समाजिक संजालय् छ्यलेगु ह्यासताय्‌गत : #गौरबयाः #NepalPrideParade #NPP(छु साल) : गथेकि सन् २०२० बलय् #NPP2020